Nagpaayos kami kamakailan ng aming bahay sa isang Pilipinong contractor. Hindi naman malakihan ang trabaho: pinalagyan namin ng bagong aparador ang isang puwang sa aming basement na hindi nagagamit at pinalagyan namin ng crown molding, trims at recessed lights ang aming living room. Napag-sangayunan na namin sa simula pa lang na babayaran lang namin ang kanilang trabaho at kami na ang bibili ng mga kasangkapan na kakailanganin.
Bago magsimula ang pasukan sa paaralan ng mga bata, nagkaroon kami ng pagkakataon na pumunta sa Liberty State Park para magpahinga at magpalipad ng saranggola. Ang totoo niyan, hindi ko na inaasahan na makakapag-saranggola pa kami bago lumamig ang panahon dahil buhat ng umuwi kami mula sa aming bakasyon sa Pilipinas ay laging may nangyayari tuwing Sabado at Linggo. Kung hindi may importanteng pupuntahan ay umuulan naman.
Dumalo ang aming buong pamilya sa concert nila Bo Sanchez at ng Kerygma na pinamagatan - Miracles II: Healing Love. Ginanap ito sa simbahan ng Christ the King sa Hillside, New Jersey . Mapalad naman kami at libre ang aming entrance fee dahil isa ako sa service team. Kasama ako sa nag-ayos ng sound-system at ako din ang namahala sa audio (minus-one) at video playback habang ginaganap ang concert. Dalawang computer ang ginamit ko - isang Sony Vaio para sa minus-one at VCD playback at ang aking lumang iBook para sa Powerpoint presentations.
Sa ikalawang araw namin sa Panglao (Bohol), plano sana namin na puntahan ang mga dolphins at mag-snorkel. Kaso, naging maalon ang dagat nuong umagang iyon kaya hindi na namin tinuloy. Minabuti na lang namin na mamasyal sa mga tourist spots sa Bohol. Madali naman kaming naka-arkila ng sasakyan, isang Nissan Urvan, sa labas ng resort. Hindi na namin kinuha ang package na binibigay ng resort dahil mahal at hindi naman namin plano na puntahan lahat. Bukod duon ay alam na ng driver ang mga lugar na dapat puntahan kaya parang may tourist guide na din kami.
Sa aming pagbabakasyon sa Bohol ay nanuluyan kami sa Alona Kew White Beach Resort, isa sa mga resort sa baybayin ng Alona Beach sa Panglao. Hindi ito ang pinaka-mamahaling resort sa isla at kung ating gagamitin ang 5 Star na pamamaraan ng pag-uuri ng mga hotel, ito ay isang 3 Stars hotel/resort lamang. Ganunpaman, hindi ito pangkaraniwan dahil maganda, malinis, madami ditong amenities at tamang-tama sa mga may kasamang bata. Mayroon itong mga kakulangan ngunit sa kabuuan ay hindi ako mag-aatubiling irekomenda ang resort na ito.